Մանիպուլյացիա

 Ինձ թվում է՝ վերլուծական եղբայրությունը հերթական անգամ մի կարևոր բան է բաց թողնում... Օրինակ՝ խոսվում է այն մասին, որ ՀԱՊԿ-ից դուրս գալու դեպքում Հայաստանը ստիպված կլինի դուրս գալ ԵԱՏՄ-ից։

Եթե ​​հիշողությունս չի դավաճանում, ապա այս խոսակցությունները սկսվել են նախարար Լավրովի դրդմամբ։ Շատերն իրենց տրամաբանական կոնստրուկցիաները կառուցում են բացառապես բարձրաձայնված տեղեկատվության հիման վրա և քիչ են ուշադրություն դարձնում, այն ասելիքին, որը պիտի ասվեր, բայց չի ասվում ․․․

Հետաքրքիր է, Լավրովին հետևելով՝ ԵԱՏՄ անդամ մյուս երկրների ներկայացուցիչները ինչ-որ կերպ մեկնաբանե՞լ են այս միտքը։ Օրինակ, այս մասին ի՞նչ է ասել Ղազախստանի նախագահ Տոկաևը կամ այս ազդեցիկ երկրի ներկայացուցիչներից որևէ մեկը։ ( ի միջի այլոց, ասում են՝ Ղազախստանի նախագահը շուտով գալու է Երևան)։

Եթե ​​այս մասին ոչ ոք ոչինչ չի ասել, ապա ո՞րն է պատճառը։

Ավելին, ԵԱՏՄ կանոնադրությունը թույլ է տալիս Ռուսաստանին միակողմանի որոշում կայացնել Հայաստանին ԵԱՏՄ անդամակցությունից բացառելու վերաբերյալ, թե՞ որոշումը պետք է լինի կոլեգիալ։ Եթե ​​կոլեգիալ, ապա մեծամասնությամբ, թե՞ միաձայն։

Եթե հիստերիկ բազարչիների ու կեղծավոր ճորտերի անհաշիվ ու անհամար բանակների տեղը բավարար թվով պրոֆեսիոնալ լրագրողներ ունենայինք, ապա վաղուց կունենայինք այս հարցերի պատասխանները։ 

Կարծում եմ, Լավրովի վերը նշված հայտարարությունից անմիջապես հետո նրանք կշտապեին ԵԱՏՄ անդամ երկրների մայրաքաղաքներ ու անհարմար հարցեր կուղղեյին երկրի առաջնորդներին... Բայց ունենք այն, ինչ ունենք, ուստի կշարունակենք հարցեր տալ և բացառելու մեթոդաբանությամբ կփորձենք ինչ-որ բան պարզել. Գուցե ստացվի։

Եւ այսպես, եթե, ըստ կանոնադրության, Հայաստանին ԵԱՏՄ-ից վտարելու որոշումը պետք է լինի կոլեգիալ, ապա արդյո՞ք Լավրովը վստահ է, որ կստանա իր ուզած արդյունքը։ Վստա՞հ է, որ օրակարգ դնելով ԵԱՏՄ-ից Հայաստանին հեռացնելու հարցը՝ Կրեմլն անսպասելիորեն չի հանդիպի մասնակից երկրների որոշ հատվածի դեմարշի։ 

Արդյոք դա հարմար ու անվտանգ առիթ չէ՞, որ նրանցից ոմանք անհրաժեշտ ազդանշաններ տան ճիշտ ուղղություններով։ Կրեմլը պատրա՞ստ է ռիսկի դիմել և բացել Պանդորայի արկղը: